ಅಧ್ಯಾಯ 3

ಸ್ನಾನಿಕ ಯೊವಾನ್ನನ ಬೋಧನೆ

(ಮತ್ತಾಯ ೩:೧-೧೨; ಮಾರ್ಕ ೧:೧-೮; ಯೊವಾನ್ನ ೧:೧೯-೨೮)

¹ಅದು ತಿಬೇರಿಯಸ್‌ ಚಕ್ರವರ್ತಿಯ ಆಡಳಿತದ ಹದಿನೈದನೆಯ ವರ್ಷ. ಆ ಕಾಲದಲ್ಲಿ ಜುದೇಯ ಪ್ರಾಂತಕ್ಕೆ ಪೊನ್ಸೆಯುಸ್‌* ಪಿಲಾತನು ರಾಜ್ಯಪಾಲನಾಗಿದ್ದನು. ಗಲಿಲೇಯ ಪ್ರಾಂತಕ್ಕೆ ಹೆರೋದನೂ, ಇತುರೆಯ ಮತ್ತು ತ್ರಕೋನಿತಿ ಪ್ರಾಂತಗಳಿಗೆ ಅವನ ತಮ್ಮನಾದ ಫಿಲಿಪ್ಪನೂ ಮತ್ತು ಅಭಿಲೇನೆ ಪ್ರಾಂತಕ್ಕೆ ಲುಸಾನಿಯನೂ ಸಾಮಂತರಾಗಿದ್ದರು. ²ಆನ್ನನೂ ಮತ್ತು ಕಾಯಫನೂ ಅಂದಿನ ಪ್ರಧಾನಯಾಜಕರು. ಆಗ ಬೆಂಗಾಡಿನಲ್ಲಿ ಜಕರೀಯನ ಮಗ ಯೊವಾನ್ನನಿಗೆ ದೇವರ ಸಂದೇಶದ ಬೋಧೆಯಾಯಿತು. ³ಆತನು ಜೋರ್ಡನ್‌ ನದಿಯ ಪರಿಸರ ಪ್ರಾಂತದಲ್ಲೆಲ್ಲಾ ಸಂಚರಿಸುತ್ತಾ, “ಪಶ್ಚಾತ್ತಾಪಪಟ್ಟು ಪಾಪಕ್ಕೆ ವಿಮುಖರಾಗಿ ದೇವರಿಗೆ ಅಭಿಮುಖರಾಗಿರಿ ಮತ್ತು ಸ್ನಾನದೀಕ್ಷೆ ಪಡೆದುಕೊಳ್ಳಿರಿ; ದೇವರು ನಿಮ್ಮ ಪಾಪಗಳನ್ನು ಕ್ಷಮಿಸಿಬಿಡುವರು,” ಎಂದು ಸಾರಿ ಹೇಳುತ್ತಿದ್ದನು. ⁴ಈ ಬಗ್ಗೆ ಪ್ರವಾದಿ ಯೆಶಾಯನ ಗ್ರಂಥದಲ್ಲಿ ಮುಂಚಿತವಾಗಿಯೇ ಹೀಗೆಂದು ಬರೆದಿಡಲಾಗಿದೆ:

                                      “ ‘ಸಿದ್ಧಪಡಿಸಿರಿ ಪ್ರಭುವಿಗಾಗಿ ಮಾರ್ಗವನ್ನು,

                                                ನೇರಗೊಳಿಸಿರಿ ಅವರಾಗಮನಕ್ಕೆ ಹಾದಿಯನು’

                                                ಎಂದು ಬೆಂಗಾಡಿನಲಿ ಘೋಷಿಸುವನೋರ್ವನು.

                                      ⁵ಭರ್ತಿಯಾಗಬೇಕು ಎಲ್ಲ ಹಳ್ಳಕೊಳ್ಳಗಳು;

                                                ಮಟ್ಟವಾಗಬೇಕು ಬೆಟ್ಟಗುಡ್ಡಗಳು;

                                                ನೇರವಾಗಬೇಕು ಅಂಕುಡೊಂಕುಗಳು;

                                                ಹಸನಾಗಬೇಕು ತಗ್ಗುಮುಗ್ಗಾದ ಹಾದಿಗಳು;

                                      ⁶ಕಾಣ್ವರು ಆಗ ಎಲ್ಲ ಮಾನವರು

                                                ದೇವಕೃಪೆಯ ಜೀವೋದ್ಧಾರವನು”

⁷ಯೊವಾನ್ನನ ಬಳಿಗೆ ಸ್ನಾನದೀಕ್ಷೆ ಪಡೆಯಲು ಜನರು ಗುಂಪುಗುಂಪಾಗಿ ಬರುತ್ತಿದ್ದರು. ಆತನು ಅವರಿಗೆ, “ಎಲೈ ವಿಷಸರ್ಪಗಳ ಪೀಳಿಗೆಯೇ, ಬರಲಿರುವ ದೈವಕೋಪದಿಂದ ತಪ್ಪಿಸಿಕೊಳ್ಳಬಹುದೆಂದು ನಿಮಗೆ ಎಚ್ಚರಿಕೆ ಕೊಟ್ಟವರಾರು? ⁸ಪಾಪಕ್ಕೆ ವಿಮುಖರಾಗಿದ್ದೀರಿ ಎಂಬುದನ್ನು ಸತ್ಕಾರ್ಯಗಳಿಂದ ವ್ಯಕ್ತಪಡಿಸಿರಿ. ‘ಅಬ್ರಹಾಮನೇ ನಮ್ಮ ಪಿತಾಮಹ,’ ಎಂದು ನಿಮ್ಮನಿಮ್ಮಲ್ಲೇ ಕೊಚ್ಚಿಕೊಳ್ಳಬೇಡಿ; ಈ ಕಲ್ಲುಗಳಿಂದಲೂ ದೇವರು ಅಬ್ರಹಾಮನಿಗೆ ಸಂತಾನ ಪ್ರಾಪ್ತಿಯಾಗುವಂತೆ ಮಾಡಬಲ್ಲರೆಂದು ನಾನು ನಿಮಗೆ ಹೇಳುತ್ತೇನೆ. ⁹ಈಗಾಗಲೇ ಮರದ ಬುಡಕ್ಕೆ ಕೊಡಲಿ ಬಿದ್ದಿದೆ; ಒಳ್ಳೆಯ ಫಲವನ್ನು ಕೊಡದ ಪ್ರತಿಯೊಂದು ಮರವನ್ನು ಕಡಿದು ಬೆಂಕಿಗೆ ಹಾಕಲಾಗುವುದು,” ಎಂದನು.

¹⁰ಆಗ ಜನಸಮೂಹವು, “ಹಾಗಾದರೆ ನಾವೇನು ಮಾಡಬೇಕು?” ಎಂದು ಕೇಳಲು, ¹¹ನಿಮಗೆ ಎರಡು ಅಂಗಿಗಳಿದ್ದರೆ, ಒಂದನ್ನು ಏನೂ ಇಲ್ಲದವನಿಗೆ ಕೊಡಿ; ಅಂತೆಯೇ ಆಹಾರವುಳ್ಳವನು ಇಲ್ಲದವನೊಂದಿಗೆ ಹಂಚಿಕೊಳ್ಳಲಿ,” ಎಂದು ಉತ್ತರಕೊಟ್ಟನು. ¹²ಅನಂತರ ಸುಂಕದವರು ಸಹ ಸ್ನಾನದೀಕ್ಷೆ ಪಡೆಯಲು ಬಂದು, “ಬೋಧಕರೇ, ನಾವೇನು ಮಾಡಬೇಕು?” ಎಂದು ಕೇಳಿದಾಗ, ¹³ಗೊತ್ತುಮಾಡಿರುವುದಕ್ಕಿಂತ ಹೆಚ್ಚಾಗಿ ಕಿತ್ತುಕೊಳ್ಳಬೇಡಿ,” ಎಂದನು. ¹⁴“ನಾವು ಮಾಡಬೇಕಾದುದೇನು?” ಎಂದು ಸಿಪಾಯಿಗಳು  ಬಂದು ಪ್ರಶ್ನಿಸಿದಾಗ, “ಬಲಾತ್ಕಾರದಿಂದಾಗಲಿ, ಸುಳ್ಳು ಬೆದರಿಕೆಯಿಂದಾಗಲಿ ಯಾರನ್ನೂ ಸುಲಿಗೆ ಮಾಡಬೇಡಿ; ನಿಮಗೆ ಬರುವ ಸಂಬಳದಿಂದ ತೃಪ್ತರಾಗಿರಿ,” ಎಂದು ಆತನು ಉತ್ತರವಿತ್ತನು.

¹⁵ಈ ಯೊವಾನ್ನನೇ ಎಲ್ಲರೂ ಎದುರು ನೋಡುತ್ತಾ ಇರುವ ಅಭಿಷಿಕ್ತನಾದ ಲೋಕೋದ್ಧಾರಕ ಆಗಿರಬಹುದೇ ಎಂದು ಜನರು ಮನಸ್ಸಿನಲ್ಲೇ ಆಲೋಚಿಸುತ್ತಿದ್ದರು. ¹⁶ಅದಕ್ಕೆ ಉತ್ತರವಾಗಿ ಯೊವಾನ್ನನು, “ನಾನು ನಿಮಗೆ ನೀರಿನಿಂದ ಸ್ನಾನದೀಕ್ಷೆ ಕೊಡುತ್ತಿದ್ದೇನೆ. ಆದರೆ ನನಗಿಂತಲೂ ಶಕ್ತರೊಬ್ಬರು ಬರುತ್ತಾರೆ. ಅವರ ಪಾದರಕ್ಷೆಗಳನ್ನು ಬಿಚ್ಚುವುದಕ್ಕೂ ನಾನು ಅರ್ಹನಲ್ಲ; ಅವರು ನಿಮಗೆ ಪವಿತ್ರಾತ್ಮರಿಂದಲೂ ಅಗ್ನಿಯಿಂದಲೂ ದೀಕ್ಷಾಸ್ನಾನ ಕೊಡುವರು. ¹⁷ಅವರ ಕೈಯಲ್ಲಿ ಮೊರವಿದೆ. ತಮ್ಮ ಕಣದಲ್ಲಿಯ ರಾಶಿಯನ್ನು ತೂರಿ, ಗಟ್ಟಿಕಾಳನ್ನು ಮಾತ್ರ ಕಣಜಕ್ಕೆ ತುಂಬುವರು. ಹೊಟ್ಟನ್ನು ಆರಿಸಲಾಗದ ಬೆಂಕಿಯಲ್ಲಿ ಸುಟ್ಟು ಹಾಕುವರು,” ಎಂದು ನುಡಿದನು. ¹⁸ಹೀಗೆ ಯೊವಾನ್ನನು ಪ್ರಬೋಧಿಸುತ್ತಾ, ಜನರಿಗೆ ಶುಭಸಂದೇಶವನ್ನು ಸಾರುತ್ತಾ ಇದ್ದನು.

¹⁹ಸಾಮಂತ ಹೆರೋದನು ಅನೇಕ ದುಷ್ಕೃತ್ಯಗಳನ್ನು ಮಾಡಿದ್ದನು. ಅಲ್ಲದೆ ತನ್ನ ಸೋದರನ ಹೆಂಡತಿಯಾದ ಹೆರೋದಿಯಳನ್ನು ಇಟ್ಟುಕೊಂಡಿದ್ದನು. ಆದ್ದರಿಂದ ಯೊವಾನ್ನನು ಅವನನ್ನು ಖಂಡಿಸಿದ್ದನು. ²⁰ಹೆರೋದನು ಯೊವಾನ್ನನನ್ನು ಕಾರಾಗೃಹದಲ್ಲಿ ಬಂಧಿಸಿ ತನ್ನ ದುಷ್ಕೃತ್ಯಗಳಿಗೆ ಮತ್ತೊಂದು ದುಷ್ಕೃತ್ಯವನ್ನು ಕೂಡಿಸಿದ್ದನು.

ಯೇಸು ಪಡೆದ ದೀಕ್ಷಾಸ್ನಾನ

(ಮತ್ತಾಯ ೩:೧೩-೧೭; ಮಾರ್ಕ ೧:೯-೧೧; ಯೊವಾನ್ನ ೧:೩೨-೩೪)

²¹ಜನರೆಲ್ಲರೂ ಸ್ನಾನದೀಕ್ಷೆ ಪಡೆಯುತ್ತಿದ್ದರು. ಯೇಸುವು ಬಂದು ದೀಕ್ಷಾಸ್ನಾನ ಪಡೆದು ಪ್ರಾರ್ಥಿಸುತ್ತಿರಲು, ಆಕಾಶವು ತೆರೆಯಿತು. ²²ಆಗ ಪವಿತ್ರಾತ್ಮ ಸಶರೀರವಾಗಿ ಒಂದು ಪಾರಿವಾಳದ ರೂಪದಲ್ಲಿ ಯೇಸುವಿನ ಮೇಲೆ ಇಳಿದರು. ಅಲ್ಲದೆ, “ನೀನೇ ನನ್ನ ಪುತ್ರನು; ನನಗೆ ಪರಮ ಪ್ರಿಯನು, ನನ್ನ ಅಪಾರ ಮೆಚ್ಚುಗೆಗೆ ಪಾತ್ರನು,” ಎಂಬ ದೈವವಾಣಿ ಕೇಳಿಸಿತು.

ಯೇಸುವಿನ ವಂಶಾವಳಿ

(ಮತ್ತಾಯ ೧:೧-೧೭)

²³ಯೇಸುವು ಬೋಧಿಸಲು ಪ್ರಾರಂಭಿಸಿದಾಗ ಅವರಿಗೆ ಸುಮಾರು ಮೂವತ್ತು ವರ್ಷ ವಯಸ್ಸು. ಯೇಸು ಜೋಸೆಫನ ಮಗನೆಂದು ಜನರು ಭಾವಿಸಿದ್ದರು.

ಜೋಸೆಫನು ಹೇಲಿಯನಿಗೆ ಹುಟ್ಟಿದನು.

²⁴ಹೇಲಿಯನು ಮತ್ತಾತನಿಗೆ, ಮತ್ತಾತನು ಲೇವಿಗೆ, ಲೇವಿ ಮಲ್ಕೀಯನಿಗೆ, ಮಲ್ಕಿ ಯನ್ನಾಯನಿಗೆ, ಯನ್ನಾಯ ಜೋಸೆಫನಿಗೆ ಹುಟ್ಟಿದನು.

²⁵ಜೋಸೆಫ್‌ ಮತ್ತಥೀಯನಿಗೆ, ನತ್ತಥೀಯ ಆಮೋಸನಿಗೆ, ಆಮೋಸನು ನಾಹೂಮನಿಗೆ, ನಾಹೂಮ ಎಸ್ಲೀಯನಿಗೆ, ಎಸ್ಲೀಯ ನಗ್ಗಾಯನಿಗೆ ಹುಟ್ಟಿದರು.

²⁶ನಗ್ಗಾಯ ಮಹಾಥನಿಗೆ, ಮಹಾಥ ಮತ್ತಥೀಯನಿಗೆ, ಮತ್ತಥೀಯಶಿಮಿಯಾನಿಗೆ, ಶಿಮಿಯಾ ಯೋಸೇಖನಿಗೆ ಹುಟ್ಟಿದರು.

²⁷ಯೋಸೇಖ ಯೋದನಿಗೆ, ಯೋದನು ಯೊವಾನ್ನನಿಗೆ, ಯೊವಾನ್ನನು ರೇಸನಿಗೆ, ರೇಸನು ಜೆರುಬಾಬಲನಿಗೆ, ಜೆರುಬಾಬಲನು ಸಲಥಿಯೇಲನಿಗೆ, ಸಲಥಿಯೇಲನು ಸೇರಿಯನಿಗೆ ಹುಟ್ಟಿದರು.

²⁸ಸೇರಿಯನು ಮೆಲ್ಕೀಯನಿಗೆ, ಮೆಲ್ಕೀಯನು ಅದ್ದಿಯನಿಗೆ, ಅದ್ದಿಯನು ಕೋಸಾಮನಿಗೆ, ಕೋಸಾಮನು ಎಲ್ಮದಾಮನಿಗೆ, ಎಲ್ಮದಾಮನು ಏರನಿಗೆ ಹುಟ್ಟಿದರು.

²⁹ಏರ್‌ ಯಹೋಷುವನಿಗೆ, ಯಹೋಷುವನು ಎಲಿಯೇಜರನಿಗೆ, ಎಲಿಯೇಜರನು ಯೋರೈಮನಿಗೆ, ಯೋರೈಮನು ಮತ್ತಾತನಿಗೆ, ಮತ್ತಾತನು ಲೇವಿಗೆ ಹುಟ್ಟಿದರು.

³⁰ಲೇವಿಯು ಸಿಮಿಯೋನನಿಗೆ, ಸಿಮಿಯೋನನು ಯೂದನಿಗೆ, ಯೂದನು ಜೋಸೆಫನಿಗೆ, ಜೋಸೆಫನು ಯೊನಾಮನಿಗೆ, ಯೊನಾಮನು ಎಲಿಯಕೀಮನಿಗೆ ಹುಟ್ಟದರು.

³¹ಎಲಿಯಕೀಮನು ಮೆಲಯಾನಿಗೆ, ಮೆಲೆಯಾನು ಮೆನ್ನನಿಗೆ, ಮೆನ್ನನು ಮತ್ತಾಥನಿಗೆ, ಮತ್ತಾಥನು ನಾತಾನನಿಗೆ, ನಾತಾನನು ದಾವೀದನಿಗೆ ಹುಟ್ಟಿದರು.

³²ದಾವೀದ್‌ ಇಶಾಯನಿಗೆ, ಇಶಾಯನು ಓಬೇದನಿಗೆ, ಓಬೇದನು ಬೋವಜನಿಗೆ, ಬೋವಜನು ಸಲ್ಮೋನನಿಗೆ, ಸಲ್ಮೋನನು ನಹಸ್ಸೋನನಿಗೆ ಹುಟ್ಟದರು.

³³ನಹಸ್ಸೋನನು ಅಮ್ಮಿನದಾಮನಿಗೆ, ಅಮ್ಮಿನದಾಮನು ಅದ್ಮಿನನಿಗೆ, ಅದ್ಮಿನನು ಅರ್ನೈಯನಿಗೆ, ಅರ್ನೈಯನು ಹೆಸ್ರೋನನಿಗೆ, ಹೆಸ್ರೋನನು ಪೆರಸನಿಗೆ, ಪೆರಸನು ಯೂದನಿಗೆ ಹುಟ್ಟಿದರು.

³⁴ಯೂದನು ಯಕೋಬನಿಗೆ, ಯಕೋಬನು ಇಸಾಕನಿಗೆ, ಇಸಾಕನು ಅಬ್ರಹಾಮನಿಗೆ, ಅಬ್ರಹಾಮನು ತೇರನಿಗೆ, ತೇರನು ನಹೋರನಿಗೆ ಹುಟ್ಟಿದರು.

³⁵ನಹೋರನು ಸೆರೂಗನಿಗೆ, ಸೆರೂಗನು ರೆಗೂವನಿಗೆ, ರೆಗೂವನು ಪೆಲೆಗನಿಗೆ, ಪೆಲೆಗನು ಎಬರನಿಗೆ, ಎಬರ್‌ ಸಾಲನಿಗೆ ಹುಟ್ಟಿದರು.

³⁶ಸಾಲನು ಕಯೀನನಿಗೆ, ಕಯೀನನು ಅರ್ಫಕ್ಷಾದನಿಗೆ, ಅರ್ಫಕ್ಷಾದನು ಶೇಮನಿಗೆ, ಶೇಮನು ನೋವನಿಗೆ, ನೋವನು ಲಾಮೆಕನಿಗೆ, ಲಾಮೆಕನು ಮತೂಷಲನಿಗೆ ಹುಟ್ಟಿದರು.

³⁷ಮತೂಷಲನು  , ಹನೋಕನು ಯೆರೆದನಿಗೆ, ಯೆರೆದನು ಮಹಲಲೇಲನಿಗೆ, ಮಹಲಲೇಲನು ಕಯಿನನಿಗೆ ಹುಟ್ಟಿದರು.

³⁸ಕಯಿನನು ಎನೋಷನಿಗೆ, ಎನೋಷನು ಸೇಥನಿಗೆ, ಸೇಥನು ಅದಾಮನಿಗೆ ಹುಟ್ಟಿದರು. ಅದಾಮನು ದೇವರ ಮಗನು.

HOME

ಮತ್ತಾಯನು ಬರೆದ ಸುಸಂದೇಶ

ಮಾರ್ಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ